ღონისძიება მრავალფეროვან და საინტერესოდ დაგეგმილ აქტივობებს მოიცავდა და მიზნად ისახავდა კულტურული მემკვიდრეობის პოპულარიზაციას, განსაკუთრებით ახალგაზრდების აქტიური ჩართულობით.
ღონისძიებას ესწრებოდნენ სამტრედიის მუნიციპალიტეტის მერი დავით ბახტაძე, თვითმმართველობის წარმომადგენლები, საგანმანათლებლო და კულტურული დაწესებულებების წარმომადგენლები, ადგილობრივი მოსახლეობა და მოწვეული სტუმრები.
დღის განმავლობაში გაიმართა რამდენიმე გამორჩეული აქტივობა:
- ინტერაქტიური პრეზენტაცია QR კოდებით – მუზეუმის საგამოფენო სივრცეებში დამთვალიერებლებს შესაძლებლობა ჰქონდათ, სხვადასხვა ენაზე გაეცნოთ მუზეუმში დაცული ექსპონატების შესახებ ინფორმაციას. ინოვაციური ფორმატი მომზადებული იყო სამტრედიის მე-11 საჯარო სკოლის მოსწავლეების მიერ, რაც ნათლად ასახავდა ახალგაზრდების ჩართულობასა და თანამედროვე ტექნოლოგიების გამოყენების მნიშვნელობას მუზეუმების საქმეში.
- თემატური კონფერენცია ნიკო ნიკოლაძის მოღვაწეობის შესახებ – მოწვეული სტუმრები და ისტორიის შემსწავლელები გაეცნენ დიდ რეფორმატორსა და საზოგადო მოღვაწე ნიკო ნიკოლაძის ცხოვრებისა და მოღვაწეობის მნიშვნელოვან ფურცლებს.
- საკონცერტო პროგრამა – დღის ბოლოს სტუმრებს ელოდათ მუსიკალური წარმოდგენა, რომელშიც მონაწილეობა მიიღეს კულტურის ცენტრის, მოსწავლე-ახალგაზრდობის სახლისა და ჯიხაიშის სამუსიკო სკოლის ნიჭიერმა მოსწავლეებმა.
დავით ბახტაძე, სამტრედიის მუნიციპალიტეტის მერი: „ნიკო ნიკოლაძის სახელობის მუზეუმი ჩვენი სიამაყეა — ადგილი, სადაც ისტორია ცოცხლდება. მუზეუმების საერთაშორისო დღე კიდევ ერთი მნიშვნელოვანი შესაძლებლობაა, ახალგაზრდებმა ღრმად ჩასწვდნენ ჩვენს მემკვიდრეობას და იგრძნონ პასუხისმგებლობა. ვულოცავ მუზეუმის თანამშრომლებს და მადლობას ვუხდი ყველას, ვინც ამ ღონისძიებაში მონაწილეობა მიიღო.“
სამტრედიის მუნიციპალიტეტის მერია მადლობას უხდის ყველა იმ ადამიანს, ვინც ჩართული იყო ღონისძიების ორგანიზებაში და კიდევ ერთხელ უსვამს ხაზს კულტურისა და განათლების სფეროების მხარდაჭერის მნიშვნელობას მუნიციპალიტეტში.
