სამტრედიის მუნიციპალიტეტში აქტიურად მიმდინარეობს ინფრასტრუქტურული პროექტები, რომლებიც ქალაქის იერსახისა და საინვესტიციო გარემოს გაუმჯობესებას ისახავს მიზნად. ამჟამად, ქალაქის ცენტრალურ ნაწილში მიმდინარე სარეაბილიტაციო სამუშაოები აქტიურ ფაზაშია.
სამტრედიის ბალნეოლოგიური კურორტის განვითარების პროცესს ოფიციალური სტარტი მიეცა.
სამტრედიის მუნიციპალიტეტის მერმა, დავით ბახტაძემ კიდევ ერთი მნიშვნელოვანი ნაბიჯი გადადგა ქალაქის განვითარებისა და საინვესტიციო გარემოს გასაუმჯობესებლად. მუნიციპალიტეტმა წარმატებით მიაღწია შეთანხმებას შპს „გლობალ ვიქტორ ჯორჯიასთან“, რომლის შედეგადაც სამტრედიას ოფიციალურად მიენიჭა უფლება ყოფილი ბალნეოლოგიური კურორტის თერმული მინერალური წყლის რესურსის გამოყენებაზე.
ეს გადაწყვეტილება ათწლეულების განმავლობაში მოუგვარებელ პრობლემას წყვეტს და ახალი პერსპექტივებს უხსნის როგორც ადგილობრივ მოსახლეობას, ასევე პოტენციურ ინვესტორებს. მუნიციპალიტეტი აქტიურად იმუშავებს აღნიშნული რესურსის სწორად გამოყენებასა და მისი ეკონომიკური პოტენციალის სრულად ათვისებაზე.
სამტრედიის მერის განცხადებით, ქალაქს აქვს უნიკალური შესაძლებლობა, კვლავ დაიბრუნოს სამკურნალო-გამაჯანსაღებელი ტურიზმის ცენტრის სტატუსი და შესაბამისი ინფრასტრუქტურის განვითარებით, ინვესტორებისთვის საინტერესო მიმართულებად იქცეს.
„მრავალი წლის შრომის შედეგად ჩვენ მივაღწიეთ შეთანხმებას თერმულ-მინერალური წყლის ლიცენზიის მფლობელთან და დღეს უკვე შეგვიძლია ვთქვათ, რომ სამტრედიას აქვს უნიკალური შესაძლებლობა – გავხსნათ ქალაქი ახალი ინვესტორებისთვის. ბალნეოლოგიური კურორტი თავის დროზე პოპულარობით სარგებლობდა როგორც საქართველოში, ასევე ყოფილი საბჭოთა კავშირის ქვეყნებში. ჩვენ ვმუშაობთ იმაზე, რომ აღვადგინოთ მისი ისტორიული ფუნქცია და სამტრედია ვაქციოთ სამკურნალო-გამაჯანსაღებელი ტურიზმის მნიშვნელოვან ცენტრად. სწორედ ამიტომ, საჭიროა, რომ ქალაქის ინფრასტრუქტურა იყოს მოწესრიგებული და თანამედროვე მოთხოვნებს შესაბამისი“, – განაცხადა სამტრედიის მუნიციპალიტეტის მერმა.
ინფრასტრუქტურული პროექტები სამტრედიის მუნიციპალიტეტში არაერთი მნიშვნელოვანი პროექტი ხორციელდება, მათ შორის:
სკვერებისა და რეკრეაციული ზონების განახლება:
- დავით აღმაშენებლის სახელობის საკათედრო ტაძრის წინ არსებული სკვერის სრული რეაბილიტაცია;
- წერეთლის #1 და თამარ მეფის #38-ის მიმდებარე სკვერის განახლება;
- ეროსი მანჯგალაძის სახელობისა და ნიკოლეიშვილის ქუჩებზე მინი მოედნების მოწყობა.
- საცხენოსნო სპორტული კლუბის იპოდრომის ბაზაზე მაყურებელთა ტრიბუნის მოწყობა.
- მუნიციალიტეტის სხვადასხვს დასახლებებში საგზაო ინფრასტრუქტურის მოწესრიგება;
- საზოგადოებრივი ჯანდაცვის ახალი ცენტრის მშენებლობა.
- სასმელი წყლის სისტემების რეაბილიტაცია, რომელიც უახლოეს პერიოდში დაიწყება;
- წყალარინების სისტემის მოწყობის პროექტი.
სამტრედიის მუნიციპალიტეტის ხელმძღვანელობა აქტიურად მუშაობს, რათა ქალაქის განახლებული ინფრასტრუქტურა არა მხოლოდ ადგილობრივებისთვის, არამედ ინვესტორებისთვისაც კომფორტული და მიმზიდველი გახადოს.
