სამტრედიის მუნიციპალიტეტის მერი დავით ბახტაძე ქალაქ სამტრედიასა და ოფეთის ადმინისტრაციულ ერთეულში მიმდინარე ინფრასტრუქტურულ სამუშაოებს ადგილზე გაეცნო. სამუშაოები მერთან ერთად დაათვალიერეს მერის მოადგილემ დავით შენგელიამ, ქალაქ სამტრედიაში მერის წარმომადგენელმა ლაშა ნიკოლეიშვილმა და მერიის ზედამხედველობის სამსახურის უფროსმა კახა ნადირაძემ.
ნინოშვილის ქუჩაზე მრავალბინიანი საცხოვრებელი სახლების ფასადების რეაბილიტაცია მიმდინარეობს. ქალაქ სამტრედიაში ასევე ახლდება №9 საბავშვო ბაღის შენობის ფასადი.
ოფეთის ადმინისტრაციულ ერთეულში გზაზე არმირებული ბეტონის საფარის მოწყობის მიმდინარე ეტაპი დასასრულს უახლოვდება. როგორც ადგილობრივები აცხადებენ, ამ მონაკვეთზე კაპიტალური გზა აქამდე არასდროს ყოფილა.
სამუშაოები გეგმა-გრაფიკის შესაბამისად მიმდინარეობს. ბოლო ორი წლის განმავლობაში პროექტის ფარგლებში დაახლოებით 11 კილომეტრი გზა მოეწყო. სამუშაოები დარჩენილ, დაახლოებით 2,2-კილომეტრიან მონაკვეთზეც გაგრძელდება.
„ჩვენი მიზანია, სამტრედიის მუნიციპალიტეტში ინფრასტრუქტურა მოსახლეობის ყოველდღიურ საჭიროებებს პასუხობდეს. ქალაქში მრავალბინიანი საცხოვრებელი სახლების ფასადების განახლებით საცხოვრებელ გარემოს ვაუმჯობესებთ, საბავშვო ბაღის შენობის რეაბილიტაციით კი სკოლამდელი აღზრდის ინფრასტრუქტურას ვაწესრიგებთ. ამასთან, სოფლებში გზების მოწყობა მოსახლეობას ყოველდღიურ გადაადგილებას გაუადვილებს. ქალაქსა და სოფლებში ინფრასტრუქტურის გაუმჯობესებას ადგილობრივი საჭიროებების გათვალისწინებით გავაგრძელებთ“, — აღნიშნა დავით ბახტაძემ.
საგზაო სამუშაოები გომის ადმინისტრაციული ერთეულის სოფელ დობიროში და სოფელ ცივწყალასთან მისასვლელ გზაზეც იგეგმება. მუნიციპალიტეტი საგზაო ინფრასტრუქტურის მოწესრიგებას სხვა დასახლებებშიც გააგრძელებს.














