სამტრედიის მუნიციპალიტეტის მერი დავით ბახტაძე „ახალგაზრდული ფესტივალის“ მონაწილეებს შეხვდა. ფესტივალში სხვადასხვა მუნიციპალიტეტიდან ახალგაზრდული მრჩეველთა საბჭოების წევრები და ახალგაზრდები მონაწილეობდნენ.
შეხვედრის ფარგლებში მერმა ახალგაზრდებთან სამტრედიის ისტორიაზე, მუნიციპალიტეტის დღევანდელობასა და განვითარების სამომავლო პერსპექტივებზე ისაუბრა. ყურადღება გამახვილდა ახალგაზრდების როლზე, მათ ჩართულობასა და ინიციატივების მხარდაჭერის მნიშვნელობაზე.
„ახალგაზრდების განათლება, განვითარება და მუნიციპალიტეტის ცხოვრებაში მათი აქტიური ჩართულობა ჩვენთვის განსაკუთრებით მნიშვნელოვანია. ახალგაზრდების ენერგია, ცოდნა და ახალი იდეები სამტრედიის განვითარების მნიშვნელოვანი საფუძველია. ჩვენი მიზანია, მათ ჰქონდეთ შესაძლებლობა, საკუთარი ინიციატივებითა და შესაძლებლობებით აქტიურად ჩაერთონ მუნიციპალიტეტის უკეთესი მომავლის შექმნაში“, — აღნიშნა სამტრედიის მუნიციპალიტეტის მერმა დავით ბახტაძემ.
„ახალგაზრდული ფესტივალის“ ორგანიზებაში აქტიურად იყო ჩართული სამტრედიის მუნიციპალიტეტის მერის ახალგაზრდული მრჩეველთა საბჭო.
ფესტივალის ფარგლებში გაიმართა პროფესორ ზაზა ადეიშვილის საჯარო ლექცია თემაზე: „საქართველოს დემოკრატიული რესპუბლიკის დამფუძნებლები სამტრედიის მუნიციპალიტეტიდან".
ახალგაზრდები, ფესტივალის ფარგლებში, დიდ ჯიხაიშში ნიკო ნიკოლაძის სახლ-მუზეუმსაც ეწვივნენ და ლექციას – „ნიკო ნიკოლაძე - ახალი ეპოქის განმანათლებელი“ დაესწრნენ.
ფესტივალი „მომავლის პარკში“ გალა კონცერტით დასრულდა.
მსმენელის წინაშე წარდგნენ მარიკო ებრალიძე, ნინუცა ბედიანიშვილი, ტატო გოდერიძე, მირიან ბერიძე, ნატა დევდარიანი, თათია დევდარიანი, „ქართული ხმები“, გიგა პაპასკირი და ზუკა ხუციშვილის ბენდი.
ღონისძიებას სალომე გოგიაშვილი უძღვებოდა.
