სამტრედიის მუნიციპალიტეტის მერიის მხარდაჭერით, „ახალგაზრდული ფესტივალი 2026“ გაიმართა. ფესტივალი მუნიციპალიტეტის მერის ახალგაზრდული მრჩეველთა საბჭოს მიერ სსიპ ახალგაზრდული სააგენტოსგან მოპოვებული გრანტის ფარგლებში განხორციელდა.
ფესტივალის პროგრამა სპორტულ, საგანმანათლებლო და კულტურულ აქტივობებს მოიცავდა. ახალგაზრდები ერთმანეთს 3x3 კალათბურთში, FIFA-ს, შაშისა და მაგიდის ჩოგბურთის ტურნირებში შეეჯიბრნენ. ასევე გაიმართა წითელი ჯვრის ტრენინგი.
ტურნირებში გამარჯვებული მონაწილეები სამტრედიის მუნიციპალიტეტის მერმა დავით ბახტაძემ დააჯილდოვა და წარმატება მიულოცა.
„ჩვენთვის მნიშვნელოვანია ახალგაზრდების ინიციატივების მხარდაჭერა და ისეთი გარემოს შექმნა, სადაც ისინი საკუთარი შესაძლებლობების გამოვლენას შეძლებენ. სასიხარულოა, რომ ახალგაზრდულმა მრჩეველთა საბჭომ გრანტი მოიპოვა და საკუთარი იდეა მრავალფეროვანი ფესტივალის სახით განახორციელა. ვულოცავ გამარჯვებულებს და მადლობას ვუხდი თითოეულ მონაწილესა და ორგანიზატორს“, — აღნიშნა დავით ბახტაძემ.
ფესტივალის მუსიკალურ ნაწილში ადგილობრივი შემსრულებლები და DJ ARKANI მონაწილეობდნენ. ღონისძიებამ ახალგაზრდებს შესაძლებლობა მისცა, ჩართულიყვნენ სხვადასხვა აქტივობაში, გაეზიარებინათ საერთო ინტერესები და ერთად გაეტარებინათ მრავალფეროვანი დღე.
